أدخل معاية اللعبة واختر فيديو او اكثر تحبه وشوف ادي ايه تعرف عن مصر
ولو وصلت للأخر بنجاح هتكسب هدية قيمة من وزارة المالية انك هتكون احد الشباب الى نستعين بيهم لنشر الثقافة المالية وتحصل على شهادة تنفعك في سوق العمل
أولاً: عرض مجموعة من الفيدوهات تحت عنوان
أزاي انت مصري ومتعرفش كثير عنها واللى بيحصل فيها- اضغط على أي فيديو او اكثر تحبه وشوف بنفسك
يعنى ايه مصر بتتحول للجمهورية الجديدة
العاصمة الإدارية الجديدة – قصة مثيرة بكل المقاييس
شاهد روعة الاستاد العالمي ومدينة مصر الأوليمبية
الجيل الرابع للثروة الصناعية
مصر نحو “الثورة الصناعية الرابعة””
الطاقة: الكهرباء والبترول
كيف تحول عجز الكهرباء الى فائض وتصدير الى 7 دول عربية وأوروبية
تطوير التعليم العالى والبحث العلمي/ نموذج جامعة مصرية تصل للعالمية – جامعة الجلالة
كيف حول المصريون العشوائيات الى مناطق حضارية مذهلة فى زمن قياسي
تصوير جوى رائع للمسار بالكامل للمونوريل والغرض منه ايه
تطوير القطارات/ القطار الكهربائى
كيف حققت مصر نجاحات عملاقة فى تطوير الطرق والبنية التحتية
تطوير قطاع الصحة
تحقيق الاكتفاء الذاتي.
أحدث واكبر مدينة غذائية فى الشرق الأوسط بالمنوفية
تنمية صعيد مصر/ مشروع المثلث الذهبى
موكب أسطورى لمومياوات ملوك مصر فى رحلة مهيبة
نحب تتفرج على الفيديو ده هيعرفك الفرق بين العملة المحلية والعملة الأجنبية
العملة الأجنبية هي العملات بتاعة الدول الأخرى زي الدولار واليورو وغيره. مصادر مصر من العملة الأجنبية بتيجى في الأساس من السياحة، والصادرات، وتحويلات العاملين المصرين من الخارج، وإيرادات قناة السويس والاستثمارات الأجنبية في مصر. والعملة الأجنبية الى بتجيلنا بتستخدمها في الاستيراد وسداد اي التزامات للعالم الخارجى لأننا لما بنستورد بندفع بالعملة الأجنبية. ومن اهم الحاجات اللى بندفع فيها عملة اجنبية القمح علشان نصنع منه رغيف لعيش والبترول وغيره وده بنسميها سلع استراتيجية. علشان كدة خطة مصر تعمل اكفتاء ذاتى من السلع ده من خلال التصنيع المحلى ليها علشان الأسعار ما تزدش.
أما العملة المحلية هي طبعاً الجنيه المصرى اللى بنستخدمه في معاملتنا اليومية وده الدولة بتصرفها على تطوير المشروعات الى اتفرجنا عليها في الفيدوهات الأولى زي مشروعات التعليم والمدارس والجامعات والصحة والمستشفيات وتوصيل المياه والغاز والكهرباء والانترنت وبناء المساكن وبناء الطرق ومرتبات الموظفين الحكوميين (والثروة الصناعية الرابعة شوف الفيديو ولو عاوز تعرف معناها ايه)
طيب نرجع ثانى يا ترى ايه هي الإجابة الصحيحة للسؤال هي الدولة بتجيب منين مصادر العملة المحلية علشان تعمل التطوير في حياتنا اليومية والخدمات؟ الإجابة هي الدولة بتجيب ده من الضرائب والإيرادات غير الضريبية من الموازنة الى بتتحصل من المواطنين والشركات.
طيب يعنى ايه ضرائب من الموازنة اتفرج على الفيديو الى بعده علشان تفهم اكثر.
خامساً ايه هي الضرائب الى بتحصلها موازنة الدولة و أنواعها وهل في عدالة في التحصيل
الإيرادات الضريبية (80% من مصادر لدولة بالعملة المحلية)
الدولة بتجيب مصادر الأموال من العملة المحلية من الضرائب اللى بيدفها المواطن المصرى والشركات والأنشطة التجارية اللى بتشتغل في مصر. الضرائب بتتسم بشكل يحقق العدالة في التحصيل. يعنى مش معقول اللى دخله كبير يدفع زي اللى دخله اقل علشان كدة هي بتدفع في شكلة نسبة مئوية % من الدخل. كل لما الدخل يزيد الضرائب المحصلة منه تزيد وده اسمه الضرائب التصاعدية. وأنواع للضرائب كالتالي:
ضرائب مباشرة: زي ضريبة الدخل اللى بتدفع على دخول الافراد والشركات، واسمها مباشرة لانها بتتخصم من مرتبك او دخلك بشكل مباشر والضريبة العقارية اللى بتدفع على العقارات مثل الشقق والاراضى، وضرائب التجارة الدولية الى بيدفعها الشركات او الافراد لما بيستوردوا من الخارج.
طيب معدل ضريبة الدخل بيوصل كام في مصر؟ من 2.5% الى 25% حسب دخل كل فرد. التفاوات الكبير ده علشان تحقيق العدالة في التحصيل. طيب المتوسط العالمى للضريبة التي بتحصلها الدول من الافراد كام؟ 40% يعنى الحد الأقصى لمصر (25%) اقل بكثير من المتوسط العالمي.
ضرائب غير مباشرة: زى ضرائب القيمة المضافة. زي ضريبة المبيعات اللى بتدفعها بشكل غير مباشر في الفاتورة لشراء أي منتج او خدمة زي في المطاعم او في الفنادق او لشراء أي سلعة زي غذاء وشراب وملابس وغيره.
طيب ليه ما اكتفتش الدولة بتحصيل بس الضرائب المباشرة من الافراد؟
هقولك الضرائب غير المباشرة مرتبطة اكثر بالسلع والخدمات الى لو استخدمتها بشكل اكثر من اللازم تدفع اكثر علشان يكون في عدالة اجتماعية يعنى لو معك فلوس اكثر من غيرك وعاوز كل يوم تاكل في مطاعم او تشترى منتجات زيادة عن احتياجك يبقى من العدل انك تدفع اكثر للدولة كمان لانك هتستفيد اكثر من غيرك بالخدمات الى بتقدمها الدولة. علشان كدة كان فيه ضرائب غير مباشرة وعاوز كمان اوضحلك ان نسبة الضرائب ده بتوصل في مصر حوالى 45% من اجمالى الحصيلة الضريبية وده منطقى جداً لأننا مجتمع إستهلاكي في المقام الأول.
سادساً طيب بما ان الدولة بتحصل الضرائب مننا ليه بنسمع كثير مصطلح موارد الدولة محدودة ويعنى ايه المصطلح ده
موازنة الدولة هي زي موازنة البيت في مصروفات بنصرفها وفى مصادر دخل بتجيلنا. مصادر الدخل من الإيرادات الضريبية الى بتمثل 80% من إيرادات الدولة عرفناها. طيب ايه هي طبيعة مصروفاتنا اللى بتخلى مواردنا محدودة؟
هقولك مصروفات الدولة هي كتالي:
- الاستثمارات وهى الأموال اللى بتتصرف على تحسين الخدمات والمشروعات الىى بتمس بشكل اساسى المشروعات الى اتفرجنا عليه في الجزء الأول وخطط تطوير الدولة وده بتوصل حوالى 27% من اجمالى انفاقنا
- اما النسبة الباقية حوالى 73% هي مصروفات بنسميها حتمية لازم نصرفها كل شهر زي أجور الموظفين العاملين بالدولة، و على دعم رغيف العيش والمعاشات، ومصادر الطاقة وهى الكهرباء والبترول والغاز ومتراكمات الفوائد لان المواطن مش بيدفع الثمن الحقيقى للمرافق اللى بتوصله لانها مرتبط أصلا بمواد بنستوردها من الخارج بأسعار مرتفعة زيى تكلفة الكهرباء والغاز والبترول ورغيف العيش. الدولة شايله عن المواطن جزء كبير جدا من السعر الحقيقى للسلع والخدمات ده في صورة دعم بتدفعة موازنة الدولة. علشان كدة مواردنا محدودة.
لكن الدولة وضعت خطة محكمة علشان تطلع من المشكلة ده من خلال محاول الإنتاج المحلى من السلع الاستراتيجية لعمل الاكتفاء الذاتي، وكمان تطوير المرافق علشان تجذب المستثمرين لخلق وظائف وعلشان تقدم خدمة افضل للمواطنين. كل الجهود ده بتندرج تحت مسمى ترشيد المصروفات.
طيب بالنسبة للايرادات بتعمل ايه الدولة علشان في ظل الموارد المحدودة تقدر تعمل المشروعات الى تم انشاءها وخطط التطوير اللى اتفرجنا عليها؟ هل هتزود الضرائب مثلا؟
شوف الإجابة على السؤال في الفيديو اللى بعده.
**************
سابعاً بما ان موارد الدولة محدودة ازاي الدولة بتتغلب علي ده وبتقدر تعمل مشروعات وخطط تطوير زي اللى اتفرجنا عليها فى فيديوهات المشروعات وهل ده معناه ان الدولة هتزود نسب الضرائب علينا
الإجابة بسيطة لا الدولة مش ناوية تزود معدلات الضريبة لسببين اولاً علشان ما يكونش في عبء مالى اضافى على المواطن. ثانيا علشان تحقق استقرار في مناخ الاعمال للمستثمرين اللى بتخوفوا من التغيرات ده وبالتالي يفضلوا يستثمروا في بلد ثانية. طب ايه الحل؟
خطة الدولة لزيادة الحصيلة الضريبة هي احداث اصلاح جوهرى في قوانين الاستثمار وبالتالي ده هيساعد الشركات تحقق أرباح وبالتالي من خلال نفس النسب الضريبة حصيلة إيرادات الدولة هتزيد بسبب ارتفاع الدخول والارباح للشركات مش اتفقنا من الأول انها نسبة مئوية كلما زاد الدخل زادت المتحصلات الضريبية وده بنسميه في علوم الاقتصاد “توسيع القاعدة الضريبية”. ثانى حاجة الدولة بتعملها انها بتحسن كفاءة التحصيل من خلال تدريب موظفين الضرائب ومراجعة القوانين اللى بتساعد على الحد من التهرب الضريبى،
وكمان نرجع لموضوع الثروة الصناعية الرابعة. الدولة بتطبق حالياً خطة محكمة للميكنة وهى تحويل كل معاملات تحصيل الضرائب ودفع الرسوم من خلال النظام الرقمى واستخدام الدفع من خلال البنوك والكمبيوتر والموبايل بدل من النظام اليدوى وده بيساعد على تقليل اهدار الأموال، وزيادة التحصيل، ومكافحة التهرب الضريبى، ومش كدة وبس بيساعد كمان على محاربة الاقتصاد غير الرسمي اللى بيشتغل تحت بير السلم بالمصطلح الدارج لان كل معاملاته هتكون مكشوفة لما نقلل استخدام الفلوس ويكون كل عمليات الدفع والتحصيل من خلال البنوك وهقولك امثلة لمشروعات الميكنة اللى بتقوم بيها وزارة المالية
- مشروع التحصيل الإلكتروني للضرائب الذي تم العمل به منذ عام 2018
- مشروع الفاتورة الالكترونية الذي تم الزام العمل به فى نوفمبر 2020
- مشروع ميكنة اجراءات العمل الضريبية الرئيسية الذي تم اطلاقه فى ديسمبر 2020
- تحويل البطاقة الحكومية الإلكترونية لصرف مستحقات العاملين بالدولة الى بطاقة «ميزة»
ممكن تعمل بحث على جوجل لو حابب تعرف أكثر كل مشروع بيتكلم عن ايه.
